Tombo Paskah. To’o Cama Agu Mori Yesus.

 1,522 total views,  2 views today


Renungan Paskah de Romo Antoni Sanor

Ende Ema Ase Kae ata hiang le Morin

Manga ca ngata anak molas. Molas tu’un. Ngasangn lut benta wone beon, Magda. Hia ngo pala ne tana data, jari mendi jera de ca keluarga. Te ma beheng kerja nitu hia, toe di co-co’on tae emo gi le majikan de hia. Le itu hia ga, temu tana, wie leso  kawe kerja pe tungku mosen.  

Le toe  sut manga kerja iwon ga, hia ga jadi ata wina “tema dia”. Pika wekin hia wone tempat da’at. Nitu hia do sut tiba se. Si demong ta ngoeng de hian nggoes kaut le hia delekn.

Pu’un  itu hia toe kaut manga perna kole beon. Na pecing ga le hia, keluargan puli pecing hia kerja ne tempat da’at. Ceng kalin hia tiba surak mai wone mai ata hetin, pe tana agu pe tombo de coo ngay kerja de hia. Maik tema wale le hia. Ritak sut hia pe tombo gu ende eman. Hia  kole ritak da’at pe kole wone beon.

Ca leson hia ga lako olo mai mbaru de Morin. Denge le hia dere wone mbaru itu cama sut agu dere wone paroki de hia mo pele paskah wone beon. Hia ngo wone gereja itu. Wone gereja itu hia puun nuk agu mangan  ilak latang kerja da’atn selama ciok ntaun ta pulin. Manga  kole ngoeng wone nain, “aku paka nganceng pean ne mai kerja ho’o. Aku kole ga, paka kole beo. Paka!”  Nggitu nukn.

Te ma beheng wa, kole beo hia puli itun. Du cai ne mbarun, gu ritak mesen hia heran sut, ai biasan pe, rewa mbaru dise pene terus kauti. Apan kole du itu wie ga tana. Pikir de hia ne mbarun te manga atan. Hia onok wone mbarun. Denge le enden agu eman sar wai de Magda. Mai wone mai kilo tana le Enden.

“Ene Magda, hau itu ko?”. Agu mesu sut kin  retan wale le Magda. ‘Heen aku. Magda’. Du pecing agu ente le ende agu eman ga, langsung nggepo lise hia. Wan retan. Le mesen nuk dise, na ma hoo di pe cumang kole.

Beheng wa ga, mai tana de Magda. “Co’o tara melot pe tema pene rewa mbaru olo mai?” Mai tae de enden “Ene Magda,  puun kaut ledong le hau mbaru ho’o, rewa mbaru olo mai toe ma sut pene kole le hami. Hami gereng kin kole de hau puun itu”.

Ende Ema Ase Kae ata momang le Morin

Cama agu Ene Magda, nggitu kole Maria Magdalena. Hia ho’o, pecing lite gauk agu ba wekin wone mosen. Bentan lata hia ata wina  tema diay. Le nggitu hia ga, diu taung lata. Hia kole pernah ba latay ngger olo mai ranga de Yesus.

Tegi lise wone Yesus, de pe adili Maria Magdalena hoo. Maik Yesus toe ma adili hia. Yesus ting ampon latang hia. Le ampon itu, ici weki de Maria Magdalena nganceng titi kole. Toe manga ata momang hia, cama agu momang de Yesus. Puun  itu Maria Magdalena ga lut terus Yesus. Hia imbi tuun Mori Yesus. Ho’o de wangkan agu pengalaman to’o kolen de Maria Magdalena.

Pengalaman to’o kole de Maria Magdalena kole ngaceng pinga lite wone apa ata  kao de hia “roco le hia wai de Mori Yesus le minyak ata mese hargan agu wae lu’un. Puli itu ga koes kole le hia le wukn”. Mese tuun momang agu imbi de Maria Magdalena latang Yesus. Itu tara hia lut terus Mori Yesus.

Wone Injil ata pinga dite ro, denge lite ga Maria Magdalena ho’o ata cekolon sut ata ngo ne kubur de Mori Yesus. Le mesen imbi, momang agu nuk de Maria Magdalena latang Morin, gula- gula sut hia ngo wone kubur de Mori Yesus. Cai nitu hia tema ente ga watu mese ta tadu rewa kubur de Mori Yesus. Imbi le hia cama-cama agu rasul ata manga nitu: mose kole ga Mori Yesus. Na tae ga le surak nggeluk: Hia paka  to’o kole ma wa mai sanggen ata mata.

Ende, Ema, Ase Kae ata Momang le Muri Keraeng

Cama gu   Magda agu  Maria Magdalena, ite kole arang pernah ga pau ne ndekok. Ko arang  ite kole ma pe onto kin wone ndekok-ndekok itus. Mo nggitun, mai ga ite to’o kole cama agu ise.

Nuk  lite sanggen ndekok itus, agu lengkang gerak latang ndekok ta puli kaon. Mo pe ejem agu teser ite wone mai ndekok itus, betuan ite ma pe guling watu mese ata pene salan dite de ruis agu Morin.

Mo puun lite ejemn, ndekok agu salan mose dite ata temanga le ca agu salan de Morin itu, betuan ga rewa pe ngger wone mose weru puun gi lengkan. Mo pe sadar agu nganceng ngo pean ite wone mai ndekok dite, ituy gi “kebangkitan” latangt ite ga.

De lengkang salan mai wone mai ndekok itus, tema nganceng deming kaut ata iwoy. Mo deming ata kaut pe gulingn watu ta tadu salan ngger le agu Morin, ce pisan sut di nganceng gulingn? Paka sut manga usaha de rud ite.

Ma pe ne seminari hami danon, kao ca acara ata ngasangn tos paskah. Tae le ketua panitia harus siap, ruha manuk.

Co’o tara paka siap ruha manukn? Gu betuan taen.

Ruha ho’o mo pe kao pecak mai pea maiy te ma nganceng pe ba mose weru laing. Maik mo pe bike le run mai wone maiy rongkamn, itu ata nganceng manga anak manuk weru.

Ende, Ema, Ase Kae ata Momang le Morin

Leso ho’o ite cama-cama lite  pe “rayakan” paskah de Mori Yesus. Hia puli to’o kole wone mai kubur’N. To’o de Mori Yesus ho’o  ca bengkes latang sanggen taun ite. Toe mangan watu ta pele laingn wone mose dite ata tema nganceng guling lite me ngoeng tuun ite pe lengkang gerak latang demong ndekok.  

Mai ga ite, cama-cama agu Magda, Maria Magdalena, agu Morin ngo pean wone mai sanggen mose dite ata temanga sesuai agu ata tuing de Morin.

Ite ngo wone mose weru; mose ruis agu Morin. Ituy de ca betuan kebangkitan, Dame demong taung ite temanga diu wone mai ranga de Morin

Tabe Paskah latang sanggen taung ite. Mori Yesus tinu ite nang tedeng len.

Salam Paskah gezeng kami see mai wongko Paji!

Tinggalkan Balasan

Alamat email Anda tidak akan dipublikasikan.